بلا پی ٹی آئی کا نشان تھا، ہے اور رہے گا، تحریک انصاف کے سینئر نائب صدر

تحریک انصاف کے سینئر نائب صدر ایڈووکیٹ شیر افضل مروت نے کہا ہےکہ بلا پی ٹی آئی کا نشان تھا، ہے اور رہے گا۔

پشاور ہائیکورٹ میں میڈیا سے گفتگو کرتے ہوئے شیر افضل مروت نے کہا کہ پرویز خٹک کے بیان کا نوٹس لینا چاہیے، بیٹ کا نشان صرف الیکشن کمیشن ہی آفر کرسکتا۔

انہوں نے کہا کہ بیٹ کا نشان آفر کرنے کی ضرورت کیوں تھی؟ پرویز خٹک نے تو تحریک انصاف کے مقابلے میں اپنی پارٹی بنائی۔

پی ٹی آئی رہنما نے کہا کہ بانی پی ٹی آئی عمران خان نے این اے 32 پشاور سے مجھے نامزد کیا تھا، اپنے حلقے لکی مروت سے بھی قومی اسمبلی کیلئے کاغذات جمع کرائے ہیں، الیکشن کہاں سے لڑنا ہے یہ فیصلہ پارٹی کرے گی۔

ان کا یہ بھی کہنا ہےکہ توشہ خانہ، القادر ٹرسٹ سمیت باقی کیسز میں بھی جلد عمران خان کی ضمانت ہوجائے گی، جب ایک پارٹی سے اس کا نشان لے لیا جائے تو شفاف الیکشن کیسے ہوں گے؟