کراچی:کراچی پریس کلب کے باہر احتجاج میں مظاہرین سے بدتمیزی کرنے والے 8 اہلکاروں کے خلاف کارروائی کرتے ہوئے انہیں معطل کردیا گیاہے۔تفصیلات کے مطابق ڈی آئی جی جنوبی سید اسد رضا نے کراچی میں دوران احتجاج خواتین مظاہرین سے بدتمیزی اور تشدد پر چھ خواتین سمیت آٹھ اہلکاروں کو معطل کر دیاہے۔معطل کیے جانے والے اہلکاروں میں ضلع کیماڑی کے محمد عفان اور سید امین، ضلع جنوبی کی نائلہ رحمن، بی بی مریم، عائشہ رحمن اور ڈسٹرکٹ سٹی کی مصباح راشد، بی بی آمنہ اور حنا گل شامل ہیں۔
ڈی آئی جی ساﺅتھ کے مطابق ایس ایس پی سی کو معاملے کی انکوائری کی ہدایت کردی گئی ہے۔ نوٹی فکیشن کے مطابق معطل کیے جانے والے پولیس اہلکاروں کوہیڈ کوارٹرز گارڈن میں سسپنڈ کمپنی بھیج دیا گیا ہے۔معطل کیے جانے والے اہلکاروں کو روزانہ رول کال اور پریڈ کی ہدایت بھی کی گئی ہے۔
ایس ایس پی سٹی کو معطل اہلکاروں کے خلاف محکمانہ کارروائی کرتے ہوئے 14 روز میں رپورٹ پیش کرنے کی ہدایت کی ہے۔نوٹی فکیشن کے مطابق ایس ایچ او عید گاہ ظہیر احمد خان کو بھی عہدے سے ہٹا دیا گیا۔ ساتھ ہی ایس ایچ او کے خلاف بھی انکوائری کا حکم دیا گیا ہے۔
