کراچی۔۔رپورٹ۔۔شہزادی کنول
جماعت اسلامی شعبہ خواتین کے تعاون سے کراچی پریس کلب میں “آرٹ آف لیونگ” کے عنوان سے پروفیسر شاہدہ قاضی ویمن کمپلیکس میں ورکشاپ کا انعقاد کیا گیا۔ورکشاپ میں خواتین صحافی مونا صدیقی کلثوم جہاں،شہزادی کنول،رباب ابراہیم،ماریہ اسماعیل،شازیہ حسن،سمعیہ خورشید،نادرہ مشتاق،عشرت خان،حنا،شفق نظام ودیگرنے شرکت کی۔
ورکشاپ کی میزبان اور موٹیویشنل اسپیکر قرة العین فیصل نے صحافی خواتین کو بامعنی اور بامقصد زندگی گزارنے کی تربیت فراہم کی۔ورکشاپ کی سربراہی گورننگ باڈی کی ممبران شازیہ حسن اور مونا صدیقی نے کی۔ قرة العین فیصل نے اپنی مدلل پریزینٹیشن کے ذریعے شرکاءکو زندگی گزارنے کی ترجیحات طے کرنے اور اپنے وڑن کو واضح کرنے پر زور دیا۔
موٹیویشنل اسپیکر نے کہا کہ زندگی میں مقصد متعین کریں، اس کے لیے منصوبہ بندی کریں اور مسلسل فالو اپ کریں۔ ایک بامعنی وژن ہی آپ کی زندگی کو بامقصد بناتا ہے تاکہ دنیا اور آخرت دونوں میں کامیابیاں نصیب ہوں۔ورکشاپ کے دوران قرة العین فیصل نے شرکا کے سوالات کے جوابات بھی دیئے۔
پروگرام کا اختتام جماعت اسلامی شعبہ خواتین کی نائب جنرل سیکریٹری، عذرا سلیم کے کلمات سے ہوا جنہوں نے آئندہ بھی ایسی ورکشاپس منعقد کرنے کی نوید سنائی۔ سیکریٹری اطلاعات جماعت اسلامی شعبہ خواتین سمرین احمد نے پروگرام کے کامیاب انعقاد پر تمام صحافی خواتین کا شکریہ ادا کیا۔ ورکشاپ میں شریک خواتین صحافیوں نے اس سرگرمی کو ایک اچھی اور بامقصد کاوش قرار دیا۔
