کراچی:جعلی پاسپورٹ پر مسافروں کو بیرون ملک بھجوانے کے حوالے سے اہم پیشرفت سامنے آئی ہے۔تفصیلات کے مطابق ایف آئی اے اینٹی ہیومن ٹریفکنگ سرکل کراچی نے گلستان جوہرمیں کارروائی کرتے ہوئے جعلسازی سے لوگوں کو بیرون ملک بھیجنے والاسہولت کار گرفتار محمد رحیم زکی کو گرفتار کرلیا۔ایف آئی ا ے نے بتایا کہ ملزم کو پہلے سے گرفتار امیگریشن اہلکار محمد عدنان کی نشاندہی پر گرفتار کیا گیا ، اس سے پہلے 2 مسافروں کو ایف آئی اے اہلکار سمیت گرفتار کیا گیا تھا۔گرفتارمسافروں کاکہنا تھا کہ ہم نے قانونی طریقے سے بیرون ملک جانے کے لئے لاکھوں روپے ادا کئے ہیں ۔ہمارا کسی جعل سازی سے کوئی تعلق نہیں ہے۔
ترجمان کا کہنا تھا کہ ملزم جعلی دستاویزات پر مسافروں کی سہولت کاری میں ملوث پایا گیا، ملزم ایئر پورٹ پر گراونڈ سروس مہیا کرنے والی نجی کمپنی کا ملازم ہے۔ایف آئی ا ے نے مزید کہا کہ ملزم نے ساتھی ملزم عدنان سے سہولت کاری کے عوض 5 لاکھ 75 ہزار وصول کیے۔ایف آئی اے کے مطابق ملزم کے خلاف مزید قانونی کارروائی شروع کردی گئی ہے۔
