بیجنگ : چینی وزارت خارجہ کا کہنا ہے کہ چین انسداد دہشت گردی میں پاکستان کی مدد جاری رکھے گا ۔
ترجمان چینی وزارت خارجہ نے پاکستان میں چینی شہریوں کی سیکیورٹی کے حوالے بات کرتے ہوئے کہا کہ چین انسداد دہشت گردی میں پاکستان کی مدد جاری رکھے گا اور دونوں ممالک دہشت گردی کے مقابلے کے لیے پرعزم ہیں۔یہ باتی انہوں نے ایک پریس کانفرنس میں کہی۔
ترجمان چینی وزارت خارجہ کا کہنا تھا کہ چین اور پاکستان کے تعلقات خراب کرنے کی تمام کوشش ناکام بنا دیں گے، دہشت گرد اپنے کیے کی قیمت چکائیں گے۔ چین اور پاکستان اسٹریٹجک شراکت دار ہیں، دونوں ملکوں کی دوستی کی بنیاد دل و دماغ میں موجود ہے، دونوں ممالک کے باہمی تعاون اور اعتماد کو ٹھیس پہنچانے کی کوششیں ناکام ہونگی۔
ان کا کہنا تھا کہ چین پاکستان کی معاشی اور سماجی ترقی میں مدد جاری رکھے گا اور مختلف شعبوں میں تعاون سے دونوں ملکوں کے عوام کو فائدہ ہوگا۔دونوں ملک دہشت گردوں کو سبق سکھانے کا عزم اور قابلیت رکھتے ہیں، دو طرفہ تعلقات کو خراب کرنے کی کوششیں کامیاب ہونے نہیں دیں گے۔
