ماتلی:ہم چاول کی پیداوار کے معیار کو بہتر بنانے، مقامی کسانوں اورملکی معیشت کو استحکام دینے کے لیے پرعزم اور کوشاں ہیں ۔یہ بات اومنی گروپ کے چیئرمین خواجہ انور مجید نے ضلع ٹنڈو محمد خان میںجدیدترین پرائیڈ رائس ملز پرائیویٹ لمیٹڈ کاباضابطہ افتتاح کرتے ہوئے کہی۔انہوں نے کہا کہ یہ پلانٹ جدید ترین ٹیکنالوجی سے لیس ہے، جو چاول کی پیداوار کو بڑھانے کے ساتھ ساتھ اعلیٰ ترین معیار کو برقرار رکھنے کے لیے ڈیزائن کیا گیا ہے۔
انہوں نے کہا کہ یہ نئی مل نہ صرف پیداوار میں اضافہ کرے گی بلکہ مقامی افراد کے لیے بڑی تعداد میں ملازمتوں کے مواقع بھی پیدا کرے گی، جس سے ملکی معیشت کو فروغ ملے گا۔ جدید زرعی پراسیسنگ پلانٹس میں سرمایہ کاری کے ذریعے، اومنی گروپ پاکستان کے ایگری بزنس سیکٹر کی ترقی میں ایک کلیدی کردار ادا کر رہا ہے۔
خواجہ انور مجید نے بتایا کہ اومنی گروپ ایک پاکستان کی نجی صنعتی کمپنی ہے، جو مختلف صنعتوں میں وسیع پیمانے پر خدمات انجام دے رہا ہے، جن میں چاول، چینی، سیمنٹ، ایتھانول، پولی پروپائلین بیگز، بجلی، آٹومیشن، اور ایوی ایشن شامل ہیں۔ کمپنی اس وقت 12 ہزار سے زائد ملازمین پر مشتمل ہے اور بین الاقوامی سطح پر اپنے کاروبار کو وسعت دینے کے لیے کوشاں ہے۔اومنی گروپ پاکستان کے سب سے بڑے چینی پیدا کرنے والے اداروں میں سے ایک ہے اور اس کے پاس نو شوگر ملز ہیں، جو مقامی آبادی اور معیشت کو بڑے پیمانے پر فوائد فراہم کر رہی ہیں۔
چیئرمین اومنی گروپ نے مزید کہا کہ پرائیڈ رائس ملز کا افتتاح اومنی گروپ کی اسٹریٹجک ترقی اور پاکستان میں صنعتی و زرعی ترقی کے فروغ کے لیے اس کے عزم کی ایک اور مثال ہے۔ جیسے جیسے کمپنی ترقی کر رہی ہے، اس کا وژن پائیدار کاروباری حل تیار کرنے پر مرکوز ہے، جو نہ صرف صنعت بلکہ ان کمیونٹیز کے لیے بھی فائدہ مند ہوں گے، جن کی یہ خدمت کر رہی ہے۔تقریب میں علاقہ معززین ،کسانوں اور مقامی رہائشیوں کی بڑی تعداد نے شرکت کی ۔
