لندن :نمائندہ خصوصی
پاکستان پیپلز پارٹی کے چیئرمین بلاول بھٹو زرداری نے کہا یے کہ جموں و کشمیر تنازعہ جنوبی ایشیائی خطے میں عدم استحکام کی بنیادی وجہ ہے اس لیے مسئلہ کشمیر کو جموں و کشمیر کے عوام کی مرضی اور منشا اور اقوام متحدہ کی قراردادوں کے مطابق حل کیا جانا چاہیے۔ ان خیالات کا اظہار انہوں نے پاکستان سے اپنی قیادت میں آئے ہوئے پارلیمانی وفد کے ساتھ آل پارٹی پارلیمانی گروپ آن کشمیر (APPG) کو ویسٹ منسٹر میں حالیہ پاک بھارت کشیدگی، بڑھتے ہوئے علاقائی عدم استحکام، اور بھارت کے غیر قانونی طور پر مقبوضہ جموں و کشمیر میں انسانی حقوق کی سنگین خلاف ورزیوں پر بریفنگ دیتے ہوئے کیا۔
اے پی پی جی برائے جموں و کشمیر کے چیئر عمران حسین ایم پی بریڈفورڈ نے وفد کا خیر مقدم کیا۔ اس موقع پر برطانیہ میں پاکستان کے ہائی کمشنر ڈاکٹر محمد فیصل اور لوٹن سے لارڈ قربان حسین ستارہ قائداعظم اور متعدد پارلیمینٹیرین موجود تھے ۔ اس موقع پر بھارت کی حالیہ فوجی جارحیت اور اس کے غیر قانونی توسیع پسندانہ عزائم کو اجاگر کرتے ہوئے گہری تشویش کا اظہار کیا گیا اور اس بات کو واضح کیا گیا ہے کہ بھارت کی حالیہ جنگی کارروائیوں میں آزاد جموں و کشمیر میں شہری علاقوں پر بلا اشتعال حملے اور سندھ طاس معاہدے کی یکطرفہ اور غیر قانونی معطلی شامل ہے، یہ اقدامات علاقائی امن کے لیے براہ راست خطرہ اور بین الاقوامی قوانین کی خلاف ورزی بھی ہیں ۔
چیئرمین بلاول بھٹو زرداری اور پارلیمانی وفد نے برطانیہ کے کشمیر پارلیمانی گروپ سے بھارت کے جارحانہ عزائم کو برطانوی حکومت کے ساتھ اٹھانے پر زور دیا ہے جبکہ یہ بھی واضح کیا گیا ہے کہ جنوبی ایشیائی خطے میں حل طلب جموں و کشمیر تنازعہ خطے میں عدم استحکام کی بنیادی وجہ ہے۔ اس لیے مسئلہ کشمیر کا منصفانہ حل جو کشمیری عوام کی خواہشات کا عکاسی ہو اور جس حل کی اقوام متحدہ کی قراردادوں نے ضمانت دی ہے ضروری ہے یہ بھی واضح کیا گیا ہے کہ بھارت کے 5 اگست 2019 کے یکطرفہ اور غیر قانونی اقدامات، بشمول آرٹیکل 370 کی منسوخی، اور بعد میں ہونے والے جابرانہ اقدامات نے علاقائی کشیدگی کو نمایاں طور پر بڑھا دیا ہے۔
مقبوضہ کشمیر میں کشمیریوں پر جبر، من مانی نظربندیوں، آبادیاتی تبدیلیوں اور آزادی اظہار پر پابندیوں کو اجاگر کرتے ہوئے وفد نے برطانیہ پر زور دیا یے کہ وہ کشمیر پر اقوام متحدہ کی سلامتی کونسل کی قراردادوں پر عمل درآمد کی حمایت کرے۔ وفد نے کشمیری عوام کے حقوق اور وقار کی مسلسل وکالت کرنے پر اے پی پی جی برائے جموں وکشمیر کا شکریہ ادا کیا اور اقوام متحدہ کی سلامتی کونسل کی قراردادوں کے مطابق کشمیریوں کے لیے پاکستان کی غیر متزلزل حمایت کا اعادہ کیا۔
