لندن :نمائندہ خصوصی
برطانیہ میں پاکستانی ہائی کمشنر ڈاکٹر محمد فیصل کی جانب سے پاکستان نژاد برطانوی مئیرز، ڈپٹی مئیرز، کونسلرز، اور مقامی نمائندوں کے اعزاز میںتقریب منعقد کی گئی ۔پاکستان ہائی کمیشن میں منعقدہ خصوصی تقریب میں برطانیہ بھر سے 250 سے زائد پاکستان نڑاد برطانوی منتخب شدہ عوامی نمائندوں نے شرکت کی۔گریٹر لندن سے لے کر مڈلینڈز، مانچسٹر، بریڈ فورڈ، برمنگھم اور گلاسگو سے مندوبین نے خصوصی شرکت کی۔
تقریب میں ہائی کمشنر ڈاکٹر محمد فیصل سمیت چیئرمین یو کے پاکستان کشمیری کونسلرز فورم لیاقت علی ایم بی ای، شئرئف آف ناٹنگھم زعفران نواز خان، برطانیہ کی مختلف باروز کے کونسلرز بشمول رخسانہ فیاض، ماجد محمود، نظام اعظم، عشرت شاہ، نگہت خان، طارق ڈار اور دیگر نے اپنے خیالات کا اظہار کیا۔ چیئرمین او پی ایف سید قمر رضا نے بھی تقریب میں خصوصی شرکت کی منتخب عوامی نما ئندوں نے کمیونٹی لیڈرشپ کو اکٹھا کرنے کے لیے ہائی کمشنر ڈاکٹر محمد فیصل اور ہائی کمیشن کے عملے کی کاوشوں کو خراج تحسین پیش کیا اور کونسلرز نے پاکستان اور برطانیہ کے مابین معاشی، تجارتی، تعلیمی اور سماجی تعلقات کو فروغ دینے کیلئے اپنے تعاون کا بھرپور اظہار کیا۔
مقررین نے برطانیہ میں موجود پاکستانی کمیونٹی کو مزید متحرک کرنے کے لیے تجاوز پیش کیں۔اس موقع پرڈاکٹر محمد فیصل نے کہا کہ برطانوی نڑاد پاکستانی ہمارے “ثقافتی سفیر” ہیں جو محنت، لگن اور استقامت جیسے اقدار کی عکاسی کرتے ہیں۔ پاکستان نژاد نمائندے برطانیہ میں جمہوریت کو مضبوط کرنے، ثقافتی تنوع کو فروغ دینے اور برطانیہ اور پاکستان کے درمیان پل کے طور پر کام کرنے میں اہم کردار ادا کر رہے ہیں۔بیرون ملک ہماری قوم کی طاقت ہمارے ڈاسپورا کے وقار، اتحاد اور خدمات سے ظاہر ہوتی ہے۔
انہوں نے کہا کہ پاکستان کی ترقی، آپ کی ترقی سے منسوب ہے کچھ منفی عناصر مذموم مقاصد کے لیے پاکستانی کمیونٹی کو بدنام کرنے کی کوشش کرتے ہیں۔ ان عناصر کا مل کر مقابلہ کریں گے۔ ہائی کمشنر نے کونسلرز پر زور دیا کہ وہ تعلیم، کاروبار، صحت اور عوامی خدمات میں برٹش پاکستانیوں، بلخصوص خواتین اور نوجوانوں کی کامیابیوں کو اجاگر کریں۔برٹش پاکستانی نوجوان پاکستان کے ثقافتی ورثے کو ترویج دینے اور پاکستان کی معیشت کو مظبوط کرنے میں بھر پور کردار ادا کریں ہائی کمشنر نے قونصلر خدمات اور دو طرفہ تعلقات کے ذریعے پاکستانی کمیونٹی کی بھر پور خدمت کرنے کے عزم کا اعادہ کیا۔ برٹش پاکستانی کمیونٹی پاکستان کو دنیا کے سامنے ایک خودمختار، استقامت اور ترقی پسند قوم کے طور پر پیش کریں۔
