کراچی :بارش کے باعث کراچی میں آج تمام اسکولوں بند رکھنے کا اعلان کیا گیا ہے جبکہ ہسپتالوں میں چھٹیاں منسوخ کردی گئی ہیں۔خیال رہے کہ سندھ مون سون سسٹم کی لپیٹ میں ہے اور سمندری طوفان کا الرٹ بھی جاری کردیا گیا ہے۔محکمہ موسمیات نے آج سندھ کی ساحلی پٹی تک سمندری طوفان بننے کا خطرہ ظاہر کیا ہے جس کے زیر اثر کراچی سمیت سندھ کے دیگر اضلاع میں موسلادھار بارش کا امکان ہے۔
کراچی سمیت صوبے کے مختلف اضلاع میں وقفے وقفے سے کہیں ہلکی اور کہیں تیز بارش کا سلسلہ جاری ہے۔بارشوں کے باعث کراچی میںآ ج بروز جمعہ تمام سرکاری اور نجی اسکول کل بند رہیں گے۔اس حوالے سے کمشنر کراچی نے حکم نامہ جاری کردیا ہے۔کمشنر کراچی کے مطابق یہ فیصلہ محکمہ موسمیات،صوبائی ڈیزاسٹر منیجمنٹ اتھارٹی سے مشاورت کے بعدکیا گیا ہے۔
بارش کے باعث کل بروز جمعہ حیدرآباد ضلع میں بھی تمام تعلیمی ادارے بند رکھنے کا اعلان کیا گیا ہے۔انتظامیہ کی جانب سے جاری نوٹیفکیشن کے مطابق حیدرآباد ضلع کے تمام سرکاری و نجی تعلیمی ادارے کل بھی بند رہیں گے۔خیال رہے کہ بارشوں کے باعث ضلع حیدرآباد میں آج بھی تعلیمی ادارے بند تھے۔ صوبے کے دیگر اضلاع سانگھڑ، نواب شاہ، جامشورو، ٹنڈوالہ یار،سجاول، میرپورخاص اور عمرکوٹ میں پہلے ہی تعلیمی ادارےبند رکھنے کا اعلان کیا جاچکا ہے۔
دوسری جانب آزاد کشمیر میں بارشوں کے باعث سرکاری اور نجی تعلیمی ادارے کل بند رکھنے کا اعلان کیا گیا ہے۔حالیہ طوفانی بارشوں کے باعث ضلعی انتظامیہ نے ہائی الرٹ جاری کر دیا ہے اور اسپتالوں میں ڈاکٹرز کی چھٹیاں منسوخ کردی گئی ہیں۔
