اسلام آباد:قومی ائیرلائن پی آئی اے نے دوران پرواز موبائل پر ویڈیوز بنانے اور فوٹوگرافی کرنے پر پابندی عائدکردی ہے۔ پی آئی اے کی جانب سے پابندی کے فیصلے پرعملدرآمد کے لیے ابتدائی آغاز کردیا گیا ہے۔ ذرائع کے مطابق پرواز کے دوران دیگر مسافروں، کسی واقعہ اور کوئی ایسی ویڈیو یا تصاویر جو ہراسانی اور غیر اخلاقی حدود کے زمرے میں آتی ہو اس عمل کو کیمرے میں محفوظ کرنے والوں کے خلاف کارروائی بھی کی جاسکے گی۔
ذرائع کا کہنا ہے کہ بین الاقوامی پروازوں کی خاص طور پر ٹیک آف اور لینڈنگ جیسے مراحل کی فوٹوگرافی پر سخت پابندی عائد ہوگی۔قومی ائیرلائن کے ذرائع کے مطابق یہ پابندی مسافروں کے تحفظ اور غیر مجاز ویڈیوز، فوٹوگرافی اور کسی بھی ہنگامی واقعات کو روکنے کے لیے عائد کی جارہی ہے۔ذرائع کا کہنا ہے کہ فوٹوگرافی اور ویڈیوز بنانے پر لگائی گئی پابندی کے اعلانات پرواز کے دوران بھی کیے جائیں گے۔
