لاہور:وزیراعلیٰ پنجاب مریم نوازنے چکن اور پولٹری مصنوعات کے نرخ میں مسلسل اضافے پر برہمی کا اظہار کیا ہے۔لاہور میں وزیراعلیٰ پنجاب مریم نواز کی زیر صدارت اجلاس ہوا جس میں وزیراعلیٰ نے چکن کی قیمت میں مصنوعی اضافے پر اظہار تشویش کرتے ہوئے برہمی کا اظہار بھی کیا۔
وزیراعلیٰ پنجاب مریم نواز نے کہا کہ چکن کے ریٹ بڑھ گئے، ذمہ دار ادارے کہاں ہیں؟ چکن پنجاب بھر میں عوام کے زیادہ استعمال کی چیز ہے، ریٹ بڑھنا گوارا نہیں۔مریم نواز کا کہنا تھا کہ پولٹری والے بزنس کریں جائز منافع کمائیں، عوام پر ناجائز بوجھ نہ ڈالیں، عوام کا احساس ہے، مافیاز کو مہنگائی کی اجازت نہیں دے سکتے۔
وزیراعلیٰ پنجاب نے چکن کی قیمت کا تعین کرنے کے لیے ریگولیٹری میکنزم تشکیل دینے کا حکم دیتے ہوئے کہا کہ نرخوں پر نظر رکھی جائے۔مہنگائی کسی صورت قابل قبول نہیں، تمام متعلقہ ادارےفیلڈ میں مانیٹرنگ کریں۔