کراچی:پاکستان میں حکومتی یقین دہانیوں کے باوجود انٹرنیٹ میں خلل کامسئلہ تاحال حل نہیں ہوسکا جبکہ پاکستان میں سست انٹرنیٹ سے بنگلادیشی کرکٹر بھی مشکل میں آگئے۔ بنگلادیش کرکٹ ٹیم ان دنوں پاکستان کے خلاف 2 ٹیسٹ میچز کی سیریز کھیلنے پاکستان آئی ہوئی ہے۔
مہمان کھلاڑی گزشتہ 4 دن سے لاہور میں ٹریننگ میں مصروف ہیں لیکن پاکستان میں انٹرنیٹ کی رفتار سست ہونے کی وجہ سے پریشانی کا شکار ہیں۔ ذرائع کے مطابق بنگلادیشی کھلاڑیوں کا کہنا ہے کہ انٹرنیٹ اسپیڈ کی وجہ سے انہیں اہل خانہ کے ساتھ رابطے میں مشکلات پیش آرہی ہیں۔
دوسری جانب ذرائع کے مطابق پاکستان کرکٹ بورڈ کا اس سلسلے میں کہنا ہے کہ بنگلادیشی ٹیم انتظامیہ نے سلو انٹرنیٹ کی اب تک کوئی شکایت نہیں کی ہے۔واضح رہے کہ وائرلیس اینڈ انٹرنیٹ سروس پرووائیڈرز ایسوسی ایشن آف پاکستان کے مطابق گزشتہ چند ہفتوں کے دوران انٹرنیٹ کی رفتار میں 30 سے 40 فیصد تک کمی ہوئی ہے۔پاکستان اور بنگلادیش کے درمیان راولپنڈی ٹیسٹ 21 اگست سے شروع ہوگا۔تاہم بارش کے باعث میچ متاثرہونے کاخدشہ ہے۔
